English
Don dara huair le trí bliana anuas, roghnaíodh Coláiste an Eargail, Leitir Ceanainn, chun ionadaíocht a dhéanamh ar Éirinn ar an stáitse Eorpach ag mórimeacht ETIM. Tabharfaidh ceathrar daltaí ón chúigiú bliain, Angel, Francine, Grace, agus Sabrina, cuairt ar an Bhruiséil i mí Dheireadh Fómhair chun páirt a ghlacadh i gCraobhchomórtas na mBan agus na gCailíní in ETIM.
Is í tionscnamh na mBan agus na gCailíní in ETIM príomhimeacht bliantúil thionscadal Girls Go Circular, atá á chomhordú ag an EIT – An Institiúid Eorpach um Nuálaíocht agus Teicneolaíocht.
Glacfaidh na daltaí, faoi threoir a múinteoirí, an tUasal Evan Gorrell agus an tUasal Marie Crossan, páirt i Lá Oideachais agus Scileanna EIT ar an 16 Deireadh Fómhair 2025, a dhíríonn ar théama ríthábhachtach na Cibearshlándála i mbliana.
Forbraíodh an coincheap ar éirigh leis ar dtús mar chuid de thionscadal na hIdirbhliana níos luaithe i mbliana. Tugann an Idirbhliain i gColáiste an Eargail saoirse do dhaltaí smaointe nua a fhiosrú, muinín a fhorbairt, agus páirt a ghlacadh i ndeiseanna spreagúla i réimsí cosúil le ETIM, fiontar, agus na healaíona.
Mar chuid den dúshlán, chruthaigh daltaí Choláiste an Eargail Detection Pro, uirlis atá deartha chun brabhsáil idirlín a dhéanamh níos sábháilte. In áit a bheith ag brath ar liosta seasta de shuíomhanna gréasáin contúirteacha, bíonn sé ag amharc amach d’iompar aisteach ar líne. Nuair a tharlaíonn rud éigin amhrasach, cuireann Detection Pro bac ar an nasc, taispeánann sé foláireamh simplí don úsáideoir, agus coinníonn sé taifead chun go ndéanfaidh an fhoireann TF athbhreithniú air.
Dúirt an tUasal Evan Gorrell, Múinteoir Gnó agus Eolaíochta Ríomhaireachta i gColáiste an Eargail: “Tá lúcháir an domhain orm go bhfuil Angel, Francine, Grace agus Sabrina ag glacadh a n-áite ar stáitse na hEorpa. Tá a smaoineamh samhlaíoch agus praiticiúil araon, agus ba mhaith liom buíochas ar leith a ghabháil le mo chomhghleacaí, an tUasal Marie Crossan, as a cruthaitheacht agus a tacaíocht le linn an tionscadail.”
Leag an Príomhoide, an tUasal McFadden, béim ar thábhacht na deise seo fosta: “Tá muid thar a bheith bródúil as na ceathrar ban óg seo a dhéanfaidh ionadaíocht ar Choláiste an Eargail agus ar Éirinn ag ócáid mór le rá dá leithéid seo. Tá rannpháirtíocht na mban i ETIM á cur chun cinn ag croílár a bhfuil ar bun againn, agus léiríonn an éacht seo cad é a thig a bhaint amach nuair a spreagtar agus a thacaítear le daltaí iniúchadh a dhéanamh ar a gcumas san eolaíocht, sa teicneolaíocht agus sa nuálaíocht.”
Leanann Coláiste an Eargail de bheith ag forbairt dea-cháil as ETIM a chur chun cinn, go háirithe i measc na mban óga. Tá comhpháirtíochtaí fiúntacha forbartha ag an scoil le heagraíochtaí áitiúla agus le hearnáil na tionsclaíochta, cosúil le OPTUM, a rinne urraíocht ar a Saotharlann ETIM den scoth, agus í ag obair go dlúth le OTA Dhún na nGall ag an am chéanna trí thionscnaimh cosúil le Pas ETIM don Ionchuimsitheacht. Cinntíonn na comhoibrithe seo, mar aon le raon leathan ábhar ETIM a chuirtear ar fáil sa scoil, go bhfuil rochtain ag daltaí ar eispéiris phraiticiúla a nascann foghlaim sa seomra ranga le deiseanna san fhíorshaol.
