English
Bhí imeacht seóthaispeántais speisialta ar siúl i Leitir Ceanainn Déardaoin seo caite, an 13 Samhain, a rinne ceiliúradh ar neart agus fás na foghlama pobail ar fud Dhún na nGall.
Eagraithe ag Bord Oideachais agus Oiliúna Dhún na nGall (ETB), leag an ócáid “Ag Dul ó Neart go Neart” béim ar raon leathan tionscadal a fhaigheann tacaíocht óna Sheirbhís Breisoideachais agus Oiliúna (FET) tríd an Chiste d’oideachas phobail REACH, agus an Ciste Comhair agus Nuálaíochta Litearthacht Aosach don Saol.
Bhí breis agus céad duine i láthair ó ghrúpaí pobail, Ionaid Acmhainní Teaghlaigh, Botháin na bhFear, agus príomheagraíochtaí contae, lena n-áirítear Leabharlann Chontae Dhún na nGall, Cuideachta Forbartha Áitiúla Dhún na nGall, Comhpháirtíocht Forbartha Inis Eoghain, agus an tSeirbhís um Fhaisnéis do Shaoránaigh, agus bhain siad sult as taispeántais iontacha ó thionscadail mhaoinithe, lena n-áirítear ealaín, beachaireacht, siúinéireacht, ceardaíocht, agus fuáil.
Leag Catherine Friel, Éascaitheoir Oideachais Pobail de chuid ETB Dhún na nGall, béim ar thábhacht an oideachais pobail agus an tionchar atá aige go fóill ar fud an chontae, “Cuidíonn foghlaim phobail le cultúr a chaomhnú, pobail láidre, nasctha a thógáil agus aonrú sóisialta a laghdú trí dhaoine a thabhairt le chéile”, a dúirt sí.
Tá Ciste REACH, a thosaigh in 2020 mar fhreagairt éigeandála le linn COVID-19, “ina thacaíocht riachtanach anois, rud a chuireann ar chumas grúpaí pobail a gcuid oibre a leathnú agus freastal ar riachtanais áitiúla,” a dúirt Éascaitheoir Oideachais Pobail Orla Winters. Go dtí seo, tá tacaíocht tugtha ag an gciste seo do 285 tionscadal sa phobal áitiúil le breis is €1.4 milliún.
Thug Comhordaitheoir Réigiúnach Litearthachta Adele McElhinney dúshlán do na freastalaithe foirm a líonadh a bhí scríofa i 13 theanga éagsúla, ag léiriú na mbacainní laethúla a bhíonn roimh go leor daoine fásta. Thug sí le fios go mbíonn duine as gach cúigear daoine fásta in Éirinn ag streachailt le téacs laethúil a léamh agus a thuigbheáil:
“Glacann an straitéis náisiúnta Litearthachta d Aosaigh don Saol, a seoladh in 2021, cur chuige uile-shochaí chun aghaidh a thabhairt ar dhúshláin litearthachta. “Tacaíonn an Ciste Comhair agus Nuálaíochta le grúpaí atá ag obair le chéile chun freagairt do riachtanais litearthachta nár sásaíodh, i measc daoine fásta ina bpobail,” a dúirt sí.
Tacaíonn Comhpháirtíocht Réigiúnach Litearthachta d’Aosaigh Dhún na nGall le cur i bhfeidhm na straitéise sa chontae. Thug Cathaoirleach na Comhpháirtíochta, Joseph Kelly ó Sheirbhís Leabharlainne Chontae Dhún na nGall, forbhreathnú ar an Chomhpháirtíocht agus ar an obair atá curtha i gcrích acu ó bunaíodh í in 2023. Tá chóir a bheith €108,000 tugtha ag an chiste seo chun tacú le tionscadail áitiúla go dtí seo.
Ba é painéal rannpháirtithe buaicphointe na hócáide, a thug léargas pearsanta ar thionchar na dtionscnamh seo. Bhí Raymond McBride ó Bhothán na bhFear Chill Mhic Réanáin, Myra McAuliffe ó Changemakers, Rose McDonagh ó Thionscadal Lucht Siúil Dhún na nGall, Treasa Ní Ghal ó Choiste Forbartha Chnoc Fola, agus Alfiia, rannpháirtí ar an chúrsa “Bainistigh Mo Theach”, i láthair ann.
Labhair Rose ar an tionscadal ‘Trav Story Sacks’ agus thug sí cur síos ar a éifeacht chumhachtach ar mhná den Lucht Siúil. Labhair sí faoin dóigh ar spreag an tionscnamh athrú glúine, agus máithreacha anois ag tabhairt a bpáistí chuig leabharlanna áitiúla agus ag baint an bhród as a gcultúr a fheiceáil léirithe ar na seilfeanna.
Spreag an ócáid líonrú, comhoibriú agus foghlaim idir grúpaí, agus tá siad seo go léir lárnach i bhforbairt leanúnach an oideachais phobail ar fud Dhún na nGall.
–
Creidmheasanna íomhá: Grianghrafadóireacht Gerard McHugh do ETB Dhún na nGall
