English
Beidh an tionscadal suntasach seo – a fuair tacaíocht ó PEACEPLUS, clár atá bainistithe ag Foras um Chláir Speisialta an AE (FCSAE) – faoi stiúir Ollscoil Teicneolaíochta an Atlantaigh, i gcomhpháirtíocht le hOllscoil Uladh, Coláiste Réigiúnach an Iarthuaiscirt, agus Bord Oideachais agus Oiliúna Dhún na nGall, i gcomhar leis an phríomhúdarás i dtaca le beartas agus rialáil trasteorann, an Lárionad um Chomhar Trasteorann (CCBC).
Le blianta fada anuas, chuir mic léinn agus oibrithe oilte ar oileán na hÉireann suas le teorainneacha dofheicthe – bacainní nach bhfuil cruthaithe ag tíreolaíocht, ach ag córais. Bíonn sé deacair d’fhoghlaimeoirí agus do ghairmithe bogadh gan srian idir an Tuaisceart agus an Deisceart mar gheall ar chreataí cáilíochta éagsúla, próisis chreidiúnaithe dhifriúla, agus rialacháin éagsúla. Anois, tá athrú le teacht air sin le tionscnamh suntasach nua.
Is comhoibriú nua cróga é an Tionscadal ESTEEM Thuaidh Theas—giorrúchán ar Oideachas, Scileanna agus Oiliúint: Soghluaisteacht Eacnamaíoch a Chumhachtú—atá faoi stiúir Ollscoil Teicneolaíochta an Atlantaigh (OTA), ag obair i gcomhar le hOllscoil Uladh, Coláiste Réigiúnach an Iarthuaiscirt, agus Bord Oideachais agus Oiliúna Dhún na nGall, le saineolas beartais ón Lárionad um Chomhar Trasteorann (CCBC). Beidh an tionscadal ar siúl ó Aibreán 2025 go Meitheamh 2029, agus tá sé mar aidhm aige cosán réidh a chruthú don oideachas agus don fhostaíocht ar fud an oileáin.
Ag croílár an tionscadail, baineann ESTEEM le deiseanna. Geallann sé faisnéis shoiléir, inrochtana a thabhairt do mhic léinn faoi roghanna staidéir trasteorann agus dul i ngleic leis na saincheisteanna córasacha a choinnigh leibhéil shoghluaisteachta ísle. I gcás oibrithe oilte, tabharfaidh sé aghaidh ar bhearnaí creidiúnaithe agus molfaidh sé leasuithe ar cheadúnú agus rialáil, rud a fhágfaidh go mbeidh sé níos fusa oibriú trasna dlínsí. Tá práinn bhreise curtha leis an obair seo ag Brexit agus Creat Windsor, toisc go dtiocfadh tuilleadh éagsúlachta sna rialacha dúshláin atá ann cheana a dhéanamh níos casta.
Cuirfidh an tionscadal trí shnáithe nasctha ar fáil: soghluaisteacht mac léinn a fheabhsú, iniomparthacht scileanna fostaíochta a threisiú, agus straitéis bunaithe ar thaighde a fhorbairt chun córais oideachais agus scileanna a ailíniú le riachtanais gheilleagair uile-oileáin. Déanfaidh staidéir phíolótacha tástáil ar réitigh phraiticiúla, agus díreoidh moltaí beartais ar shoghluaisteacht a dhéanamh níos simplí agus níos cothroime.
Le fada an lá, laghdaigh constaicí ar shoghluaisteacht infhaighteacht tallann, chuir siad teorainn leis an toradh ar infheistíocht phoiblí san oideachas, agus chuir siad srian ar fhás eacnamaíoch. Trí na bacainní seo a shárú, tá súil ag ESTEEM Thuaidh Theas timpeallacht scileanna níos saibhre, níos nasctha a chruthú – ceann a chumasaíonn foghlaimeoirí, a neartaíonn tionscal, agus a spreagann rathúnas ar fud na hÉireann agus Thuaisceart Éireann.
Dúirt Paul Hannigan, Leas-Uachtarán um Rannpháirtíocht Trasteorann ag OTA, ag aithint an mhaoinithe ón FCSAE don tionscnamh tábhachtach seo, “Léiríonn maoiniú PEACEPLUS do Thionscadal ESTEEM Thuaidh Theas muinín i gcumas Bhraisle Oideachais Threasaigh an Iarthuaiscirt dul i ngleic leis na dúshláin fhíora, phraiticiúla a chuireann srian ar shoghluaisteacht ar fud ár réigiúin teorann. Trí bhacainní san oideachas, i scileanna agus in aitheantas don lucht saothair a shárú, ní hamháin go bhfuil muid ag cruthú deiseanna nua d’fhoghlaimeoirí agus d’oibrithe ach tá muid ag réiteach an bhealach do rathúnas eacnamaíoch níos mó agus comhoibriú trasteorann níos láidre.”
Dúirt an tOllamh Malachy Ó Néill, Stiúrthóir Rannpháirtíochta Réigiúnaí, Ollscoil Uladh: “Tá lúcháir ar Ollscoil Uladh a bheith ina comhpháirtí i dtionscadal ESTEEM Thuaidh Theas. Tacaíonn an infheistíocht shuntasach ó Chlár PEACEPLUS go díreach lenár dtiomantas Réigiúnach maidir le deiseanna a chruthú do gach duine a chuideoidh, ina dhiaidh sin, le saolta a athrú. Ag obair i gcomhar lenár nIonad Beartais Eacnamaíochta, ba mhaith linn nuálaíocht, infheistíocht agus rochtain ar dheiseanna a spreagadh ar dhá thaobh an teorainn. Tá muid ag dúil le tacú le torthaí an tionscadail seo.”
Dúirt Leo Murphy, Príomhoide agus Príomhfheidhmeannach, Coláiste Réigiúnach an Iarthuaiscirt (NWRC), “Tá áthas ar Choláiste Réigiúnach an Iarthuaiscirt rath thionscadal ESTEEM Thuaidh Theas a fheiceáil, tionscadal atá faoi stiúir NWTEC agus Ollscoil Teicneolaíochta an Atlantaigh i gcomhar le hOllscoil Uladh, Coláiste Réigiúnach an Iarthuaiscirt, ETB Dhún na nGall, agus an Lárionad um Chomhar Trasteorann. Cuirfidh an chomhpháirtíocht seo eolas soiléir, reatha ar fáil d’fhoghlaimeoirí maidir le conairí tríú leibhéal agus scileanna agus tabharfaidh sí aghaidh ar na bacainní córasacha a chuireann srian ar staidéar trasteorann agus ar shoghluaisteacht lucht saothair oilte. Bunaithe ar thaighde láidir agus ar bhearta praiticiúla, feabhsóidh ESTEEM soghluaisteacht agus deiseanna ar fud ár ngeilleagair réigiúnach.”
Dúirt Príomhfheidhmeannach Bhord Oideachais agus Oiliúna Dhún na nGall (ETB), Anne McHugh, “Is é misean ETB Dhún na nGall deiseanna oideachais agus oiliúna a chur ar fáil a chuidíonn le mic léinn a lánacmhainneacht a bhaint amach agus cur le saol sóisialta, cultúrtha agus eacnamaíoch a bpobal. Mar chontae teorann, tacaíonn an tionscnamh seo, ag obair lenár gcomhpháirtithe i mBraisle Oideachais Threasaigh an Iarthuaiscirt (NWTEC), a bhfuil sé d’aidhm leis cosán réidh a chruthú don oideachas agus don fhostaíocht ar fud an oileáin, linn sa mhisean seo. Tá muid thar a bheith buíoch as an obair seo atá maoinithe ag PEACEPLUS agus as tacaíocht a fháil ón Lárionad um Chomhar Trasteorann.”
Dúirt Stiúrthóir an Lárionaid um Chomhar Trasteorann, an Dr Anthony Soares: “Tá áthas ar an Lárionad a bheith páirteach i dtionscadal a chuirfidh go mór lena chinntiú go mbainfimid leas as na deiseanna a thiocfadh a bheith rathúil trí chomhoibriú trasteorann. Trí bhacainní ar shoghluaisteacht trasteorann a shárú agus trí chomhoibriú trasteorann leanúnach idir na comhpháirtithe agus na páirtithe leasmhara, cuideoidh tionscadal ESTEEM Thuaidh Theas le hoileán na hÉireann fás agus tallann a choinneáil chun tacú le geilleagar dinimiciúil.”
Dúirt Príomhfheidhmeannach FCSAE, Gina McIntyre: “Is tionscadal é ESTEEM Thuaidh Theas atá maoinithe trí Limistéar Infheistíochta Chlár Pleanála Straitéiseach agus Rannpháirtíochta PEACEPLUS a léiríonn an tábhacht a bhaineann le comhoibriú i réimsí tábhachtacha a rachaidh chun tairbhe do shaoránaigh ar fud oileán na hÉireann. Léireoidh sé an dóigh ar féidir linn réitigh a mbíonn tionchar acu a aimsiú ar dhúshláin atá ann ar an dá thaobh den teorainn.”
–
Preasráiteas arna sholáthar ag ATU