English
Bhailigh Airí sinsearacha rialtais, ceannairí sibhialta agus páirtithe leasmhara réigiúnacha tábhachtacha ag Tithe na Parlaiminte, Stormont i mBéal Feirste an tseachtain seo le haghaidh seoladh oifigiúil Phlean Fáis Straitéisigh athbhreithnithe an Iarthuaiscirt agus síniú Meabhrán Tuisceana (MT) trasteorann nua suntasach ar Shláinte.
Thug an ócáid ardphróifíle, a reáchtáladh sa Ghailearaí Fada ag Stormont, an Chéad-Aire, Michelle O’Neill, an Leas-Chéad-Aire, Emma Little-Pengelly, an tAire Geilleagair, an Dr Caoimhe Archibald agus an tAire Sláinte, Mike Nesbitt, le chéile, mar aon le Méara Chomhairle Chathair Dhoire agus Cheantar an tSratha Báin, an Clr Grace Uí Niallais agus Cathaoirleach Chomhairle Contae Dhún na nGall, an Clr Paul Canning. Léiríonn a láithreacht an tacaíocht atá ann d’fhorbairt leanúnach Réigiún Cathrach an Iarthuaiscirt mar phríomhthiománaí eacnamaíoch agus sóisialta ar oileán na hÉireann.
Thug an ócáid ionadaithe sinsearacha ó phríomheagraíochtaí comhpháirteacha le chéile fosta, lena n-áirítear Iontaobhas Sláinte agus Cúraim Shóisialaigh an Iarthair agus Feidhmeannacht na Seirbhíse Sláinte, mar aon le páirtithe leasmhara ar fud an rialtais áitiúil, an oideachais, an ghnó agus na forbartha réigiúnaí, rud a léiríonn fairsinge an chomhoibrithe atá taobh thiar de chur chuige Réigiún Cathrach an Iarthuaiscirt.
Bhí síniú foirmiúil an Mheabhráin Tuisceana maidir le Cúram Sláinte an Iarthuaiscirt lárnach don ócáid. Bhí ceannaireacht shinsearach ó Iontaobhas Sláinte agus Cúraim Shóisialaigh an Iarthair agus Feidhmeannacht na Seirbhíse Sláinte páirteach. Neartaíonn an comhaontú tiomantas comhroinnte chun torthaí sláinte agus comhoibriú seirbhísí a fheabhsú ar fud an réigiúin, ag aithint nádúr uathúil trasteorann an Iarthuaiscirt agus tábhacht an tsoláthair chomhcheangailte do phobail a chónaíonn, a oibríonn agus a bhfuil rochtain acu ar sheirbhísí ar fud an dá dhlínse.
Leagtar amach sa Phlean Fáis Straitéiseach athbhreithnithe fís uaillmhianach atá nasctha, rathúil, iomaíoch agus inbhuanaithe, do Réigiún Cathrach an Iarthuaiscirt lena n-áirítear Doire, an Srath Bán, Leitir Ceanainn agus ceantar níos leithne Dhún na nGall. Tugann sé tús áite do bhonneagar agus nascacht fheabhsaithe, scileanna agus nuálaíocht fheabhsaithe agus torthaí sláinte agus folláine níos láidre. Léiríonn sé fosta comhpháirtíochtaí neartaithe ar fud an oideachais, an ghnó agus na seirbhísí poiblí, ag cur an réigiúin chun cinn mar phríomhthiománaí fáis chothrom réigiúnach.
Ag labhairt ag an ócáid, dúirt Méara Chomhairle Chathair Dhoire agus Cheantar an tSratha Báin, an Clr Grace Uí Niallais: “Is léiriú cumhachtach agus praiticiúil é an lá inniu ar is féidir a bhaint amach trí chomhpháirtíocht leanúnach agus trí fhís chomhroinnte fhadtéarmach don Iarthuaisceart. Feidhmíonn an réigiún seo mar limistéar eacnamaíoch agus sóisialta aonair, agus aithníonn seoladh an Phlean Fáis Straitéisigh na dúshláin agus na deiseanna suntasacha atá mar chuid de sin. Tá síniú an Mheabhráin Tuisceana maidir le Sláinte seo thar a bheith tábhachtach. Léiríonn sé an dóigh a bhfuil ár bpobail beo trasna teorainneacha cheana féin agus leagann sé amach gealltanas soiléir ónár gcomhpháirtithe sláinte chun seirbhísí níos comhordaithe, níos inrochtana agus níos éifeachtaí a chur ar fáil. Le chéile, léiríonn fógraí an lae inniu tacaíocht láidir pholaitiúil agus fócas athnuaite ar fheabhsuithe fiúntacha a sheachadadh i mbonneagar, sláinte, scileanna agus deiseanna eacnamaíocha do gach duine san Iarthuaisceart.”
Dúirt Cathaoirleach Chomhairle Contae Dhún na nGall, an Clr Paul Canning: “Is ócáid shuntasach í seo i neartú leanúnach an comhoibriú trasteorann idir Dhún na nGall, Doire agus an Srath Bán. Tá an comhoibriú tábhachtach le fada an lá i Réigiún Cathrach an Iarthuaiscirt, agus athdhearbhaíonn imeacht an lae inniu an tiomantas comhroinnte sin chun todhchaí atá níos athléimní agus níos rathúla a thógáil le chéile. Cuireann an Plean Fáis Straitéisigh treochlár soiléir agus uaillmhianach ar fáil don réigiún, agus aithníonn an Meabhrán Tuisceana maidir le Sláinte na fírinní praiticiúla a bhíonn roimh ár bpobail agus leagann sé bunchloch láidir síos le haghaidh seachadadh seirbhísí níos comhtháite. Trí údaráis áitiúla, rialtais agus gníomhaireachtaí tábhachtacha, ag obair i gcomhpháirtíocht, tá muid ag cruthú na gcoinníollacha le haghaidh fáis inbhuanaithe agus feabhas ar cháilíocht na beatha ar fud an réigiúin ar fad.”
Dúirt an Chéad-Aire Michelle O’Neill: “Is réigiún é an tIarthuaisceart a bhfuil uaillmhian, tallann agus deiseanna ollmhóra ann, agus tá cuntas teiste bródúil aige maidir le nuálaíocht agus comhpháirtíocht. Léiríonn seoladh an Phlean Fáis Straitéisigh athbhreithnithe inniu ár n-uaillmhian chomhroinnte chun tógáil ar na láidreachtaí agus chun deiseanna nua a chruthú do dhaoine, do phobail agus do ghnólachtaí ar fud an réigiúin.
“Is príomhthosaíocht go fóill don Fheidhmeannas cothromaíocht réigiúnach níos fearr a chur ar fáil, agus tá muid tiomanta do thacú le hinfheistíocht a chuidíonn le pobail a bheith faoi bhláth agus a lánacmhainneacht a bhaint amach. Is sampla dearfach eile de chomhpháirtíocht i mbun gnímh é síniú an Mheabhráin Tuisceana maidir le Sláinte seo, ag neartú seirbhísí agus ag cuidiú le torthaí níos fearr a sheachadadh do dhaoine ar fud an Iarthuaiscirt.”
Dúirt an Leas-Chéad-Aire Emma Little-Pengelly: “Cuirim fáilte mhór roimh sheoladh an Phlean Fáis Straitéisigh athbhreithnithe don Iarthuaisceart, ina leagtar amach creat soiléir agus uaillmhianach chun fás eacnamaíoch a chur chun cinn.
“Cé go bhfuil cothromaíocht réigiúnach go fóill tábhachtach, is é an sprioc a ba cheart a bheith againn ná rathúnas fíor a bhaint amach i ngach cuid de Thuaisceart Éireann. Is céim shuntasach chun tosaigh an plean seo chun an uaillmhian sin a bhaint amach.
“Le fócas láidir ar scileanna agus nuálaíocht, mar aon le feabhsuithe ríthábhachtacha ar bhonneagar agus nascacht, leagann sé na bunchlocha le haghaidh rath eacnamaíoch inbhuanaithe agus rathúnas fadtéarmach.”
Dúirt an tAire Geilleagair an Dr Caoimhe Archibald: Leagann an plean seo amach cur chuige láidir, comhcheangailte chun dul i ngleic le dúshláin bhonneagair atá ann le fada, scileanna agus nuálaíocht a neartú, agus chun tacú le poist ar ardchaighdeán.
“Ag cur leis an mhóiminteam atá ar bun cheana féin – ó nascacht atá ag fás agus earnáil turasóireachta atá ag méadú go hinfheistíochtaí móra tríd an Mhargadh Cathrach agus leathnú Mhig Aoidh – cuireann an plean cosán soiléir ar fáil chun réigiún cathrach níos iomaíche, níos nasctha agus níos rathúla a sheachadadh san Iarthuaisceart, agus comhpháirtíocht láidir trasteorann mar bhonn faoi.”
Dúirt an tAire Sláinte Mike Nesbitt: “Cuirim fáilte roimh an chomhpháirtíocht nua idir Iontaobhas an Iarthair agus Ceantar Cúraim Sláinte Comhtháite Dhún na nGall. Ba phríomhfhócas domsa mar Aire aghaidh a thabhairt ar neamhionannais sláinte, agus déanann an chomhpháirtíocht seo tosaíocht straitéiseach di.
“Tá sé mar aidhm aici torthaí sláinte a fheabhsú dóibh siúd san Iarthuaisceart agus tá sé ag teacht le m’fhís ‘bog ar chlé’ agus le Múnla Comharsanachta Sláinte agus Folláine a foilsíodh ar na mallaibh, ag díriú ar chosc agus ar chúram pobail. Tá mé ag dúil le cloisteáil faoi dhul chun cinn na comhpháirtíochta sna míonna amach romhainn.”
Dúirt Príomhfheidhmeannach Chomhairle Chathair Dhoire agus Cheantar an tSratha Báin, John Kelpie: “Tá an dul chun cinn atá á fheiceáil againn inniu bunaithe ar bhlianta de chomhpháirtíocht oibre idir an rialtas áitiúil, gníomhaireachtaí reachtúla agus páirtithe leasmhara réigiúnacha. Is sampla soiléir é Plean Fáis Straitéisigh an Iarthuaiscirt de dhóigh ar féidir le huaillmhian chomhroinnte, a bhfuil tacaíocht aici ó rialachas agus comhoibriú láidir, fíorthorthaí a bhaint amach do phobail. Leanfaimid orainn ag obair go dlúth lenár gcomhpháirtithe i gComhairle Contae Dhún na nGall, i ranna rialtais agus in eagraíochtaí seachadta tábhachtacha lena chinntiú go n-aistrítear na huaillmhianta atá leagtha amach sa phlean ina sochair eacnamaíocha, sóisialta agus sláinte inláimhsithe don réigiún.”
Dúirt Príomhfheidhmeannach Chomhairle Contae Dhún na nGall, John McLaughlin: “Tá ár gcomhpháirtíocht le Comhairle Chathair Dhoire agus Cheantar an tSratha Báin go fóill mar chuid lárnach de rath Réigiún Cathrach an Iarthuaiscirt. Trí chomhphleanáil, infheistíocht ailínithe agus cur chuige comhordaithe i leith seachadadh seirbhísí, tá muid ag léiriú luach an chomhoibrithe trasteorann chun aghaidh a thabhairt ar dhúshláin chomhroinnte agus deiseanna nua a scaoileadh saor.
Léiríonn an Plean Fáis Straitéisigh agus an Meabhrán Tuisceana maidir le Sláinte comhpháirtíocht atá ag aibiú atá dírithe ar sheachadadh, ar nuálaíocht agus ar chinntiú go mbainfidh ár bpobail leas as réigiún níos nasctha agus níos comhtháite.”
Chríochnaigh an ócáid le béim láidir ar sheachadadh agus ar na chéad chéimeanna eile, cur i bhfeidhm leanúnach an Phlean Fáis Straitéisigh agus neartú na gcomhpháirtíochtaí a dtacaíonn an dá rialtas leo ina measc. Le hinfheistíocht agus comhoibriú suntasach ar siúl cheana féin, dhearbhaigh na ceannairí a dtiomantas chun a chinntiú go leanfaidh Réigiún Cathrach an Iarthuaiscirt ag fás mar réigiún bríomhar, nasctha agus iomaíoch go hidirnáisiúnta.
Tá Plean Fáis Straitéiseach an Iarthuaiscirt ar fáil ag – www.growderrystrabane.com.
–
Preasráiteas arna sholáthar ag Comhairle Chathair Dhoire agus Cheantar an tSratha Báin.